PERE TOBARUELA: Viaxes dun can de palleiro

Editorial: Santiago de Compostela. Sotelo Blanco Edicións, 2009

ISBN / ref: 978-84-7824-573-4
Sinopse:
Novela dirixida especialmente ao público xuvenil na que un can de palleiro narra as aventuras que compartiu con Ulises. Trátase do famoso heroe grego? Si, pero segundo este can de palleiro, Ulises non era grego, era galego, concretamente do Xobre, unha antiga vila de pescadores que hoxe forma parte da Pobra do Caramiñal.

“Eu son un can de palleiro, un can de aldea. Coma quen di, un ninguén. O meu nome non importa. O realmente importante desta historia é a historia mesma. Unha aventura popularmente coñecida como A Odisea.
Non son, nin moito menos, o célebre can Argos, sempre fiel a Ulises. Argos morreu. Era o típico can de raza: estilizado e de boa planta, pero pouco afeito ás emocións fortes.
Eu son un sinxelo can de palleiro orixinario da Barbanza. Miña nai abandonárame cando era un cativo. O meu amo Ulises atopoume...”

Para saber máis sobre Pere Tobaruela...

PERE TOBARUELA: Vouvos papar

Editorial: Santiago de Compostela. Sotelo Blanco Edicións, 2009
ISBN / ref: 978-84-9782-924-3
Autores: Luz Méndez e Pere Tobaruela.
Ilustrador: Daniel Xove.
Sinopse:
Vouvos papar de Luz Méndez e Pere Tobaruela é a historia de Tucho e Mucha, dous nenos que conectados polo correo electrónico e o programa de chat, cando xogaban ao “Buscaminas”, ao seu xogo preferido, viven unha aventura na Internet cando os chucha o seu ordenador coma se os prendese unha aspiradora. Quen é que os quere papar? E ben raro todo isto, non si? Daniel Xove ilustrou esta apaixonante aventura, a primeira na literatura infantil galega que se desenvolve no mundo das pantalllas e dos programas informáticos.

Se queres saber máis sobre Pere Tobaruela...

PERE TOBARUELA: Con ollos de neno

Editorial: Santiago de Compostela. Sotelo Blanco Edicións, 2009
ISBN / ref: 978-84-935609-0-1
A primeira experiencia literaria en galego deste escritor catalán. Cunha mirada crítica, reflexiona sobre o mundo actual e os problemas que preocupan aos cativos.

Se queres saber máis sobre Pere Tobaruela...

DAVID D. VÁZQUEZ ÁLVAREZ: Orballo da mañá

Sinopse:
O barco, no que Lisa ía regresar ao seu país despois das vacacións, agardaba no porto de Casablanca cheo de luces, de bandeiras de cores, de música... No fondo sentía moito deixar alí á súa amiga, que coñecera soamente unhas semanas atrás... no entanto unha parte da súa alma ficaba mesturada coas areas do incrible deserto.

Nadia tamén viaxaría moi pronto cara ao norte onde seguro que algún día se atoparían, mais o seu barco non tería bandeiriñas nin luces de cores nin música... ela terá que deixar ao seu sabio avó Ismael e á súa amiga Soraia, a vida de miseria pero feliz no poboado, e vivir unha dramática viaxe coa súa familia para conseguir un futuro mellor en Europa e reencontrarse coa súa mellor amiga, Lisa.

Para saber máis sobre David D. Vázquez Álvarez...

DAVID D. VÁZQUEZ ÁLVAREZ: Na solaina

Sinopse:
Ana é unha de tantas mulleres que naceran na segunda década do século XX e que viu rota a súa vida pola marcha do seu ser máis querido á outra beira do océano na procura duns pesos... e por unha guerra que nunca tiña que ter comezado... pola soidade, pola xenreira. Séntese, cando era moza, case unha nena, na obriga de abandonar a súa casa, a súa familia, coa soa idea de afastarse de todo para sempre, tentando ao mesmo tempo fuxir dos recordos que ameazaban con relala por dentro.

Para saber máis sobre David D. Vázquez Álvarez...

DAVID D. VÁZQUEZ ÁLVAREZ: Améndoas e flores silvestres

Sinopse:
Avanzaba o século XI cara ao seu remate nunha época de xenreira, de escravitude, de pandemias, de liortas e de guerras. Roi nace nunha pequena aldea asentada no val onde remata o reino de Galicia. É o fillo do ferreiro, un servo máis de don Guzmán, o conde que o domina todo desde a súa fortaleza amurallada. Desde moi pequeño, o mozo soña con ser, un día, un home libre para poder ser armado cabaleiro. Coñece polo seu avó, o mago, o druída, as historias do rei Arturo e a existencia do Santo Graal, o que o vai levar por inhóspitas e estrañas paraxes coa soa compaña de Alba, decidida, tamén, a romper co pasado, coas ataduras das tradicións e do destino que para ela marcou o seu pai, o conde. Xuntos van descubrir onde se agocha a verdadeira liberdade.

Para saber máis sobre David D. Vázquez Álvarez...

PEQUENA BIBLIO-BIOGRAFÍA DE DAVID D. VÁZQUEZ ÁLVAREZ

David D. Vázquez Álvarez nace o 6 de agosto de 1953 en Arcos de Valdeorras, concello de Vilamartín (Ourense). Realizou os seus estudos na Bañeza, Astorga e Ourense. É mestre de Ensino Primario, exercendo en Abanqueiro, Vilamartín. Actualmente imparte maxisterio no Barco de Valdeorras.
Escribe novela, contos infantís e xuvenís. E, aínda que “no baúl dormen varias historias agardando que lles chegue a súa hora”, contan na súa bagaxe obras como O ruliño branco (libro infantil de relatos curtos), Orballo da mañá (diario dunha nena de doce anos no sur de Marrocos, obrigada a montar nunha lancha, rumbo á terra prometida), Na solaina (historia de Ana, unha desas tantas mulleres que naceron na segunda década do século XX e que viu rota a súa vida pola marcha do seu ser máis querido á outra beira do océano na procura duns pesos e por unha guerra que nunca tiña que ter comezado, pola soidade, pola xenreira), Améndoas e flores silvestres (ambientada no século XI, Roi, o fillo dun ferreiro e servo do conde don Guzmán, foxe na compaña de Ana e xuntos van vivir estrañas aventuras como o seu encontro co rei Artur ou co Santo Graal).

Premios:

Foi galardonado en 1985 co Primeiro Premio no II Certame de Poesía A Ouriceira, Val do Incio (Lugo), cun conxunto de poemas titulados Ribeirán do Sil
En 2008 gaña o Primeiro Premio do VII Certame de relato curto “José Saramago” convocado pola Asociación de Bibliotecas de Santiago de Compostela, coa súa obra Laio na serra.

Publicacións:

• Améndoas e flores silvestres. Colección Meiga Moira. Baía Edicións, 2008.
• Na Solaina. Colección Meiga Moira. Baía Edicións, 2008.
• O orballo da mañá. Colección Meiga Moira. Baía Edicións, 2006.
• O ruliño branco, un libro de relatos e contos sacado á luz pola Asociación Pedagóxica “Vagalume” do Barco de Valdedorras en 2005.
• Adaptacións teatrais para a escola pero a nivel local e algunha que outra obra para representar cos/coas seus/súas alumn@s, baseadas en contos populares.

Palabras do autor:

“Gústame moito a miña profesión e o mundo dos rapaces aínda que desexaría que non quixésemos convertelos en maiores antes de tempo, sen darlle a oportunidade de gozar da súa infancia, dos seus maiores e do agarimo que a nós nos deron”.
“Unha das miñas afeccións favoritas é camiñar pola aldea na que nacín á beira do regueiro Farelos, sentarme ao fresco das súas augas saltonas coa xente que coma min coñeceu na súa beira unhas paraxes virxes, fermosas...”
“Sinto un engado especial polo mar xunto ao que me achego en canto teño ocasión... talvez sexa porque nel coñecín hai preto de trinta anos á rapaza que desde entón comparte a miña vida”.
“Comecei a escribir no mesmo intre que descubrín que un papel era como un amigo ao que lle podes contar todo e que sempre está disposto a prestarche atención... cando comprobei que existían dúas clases de persoas: as que sempre podían falar aínda que non tivesen nada que dicir e as que tiñan que escoitar e gardar os seus pensamentos por importantes que fosen”.

Podes visitar tamén o encontro dos alumnos co autor: Encontro con David D. Vázquez Álvarez

Achegámonos ao teatro

“O Moucho Azul” inaugurouse, desinhibidamente, coa sesión “A chorar que hai que rir”, lectura dramatizada de Os vellos non deben de namorarse de Castelao.

@s nos@s clubeir@s continuarán a lectura da obra teatral na casa para logo compartir comentarios e opinións relacionados co libro do rianxeiro.

Entrevista ao escritor DAVID DANIEL VÁZQUEZ, realizada por Araceli Lago Rodríguez e Jennifer Pérez Gómez, alumnas de 4º B da ESO.

Chegamos ao salón de actos a xunto del, o primeiro que nos dixo foi que estaba moi contento de estar connosco para falar dun libro seu que sabía ou supuña que todos nós leramos.

-A que anos comezaches a escribir e cal foi o motivo que te impulsou a facelo?
-Comecei aos 15 ou aos 16 anos, non me lembro a idade xusta pero andaría por aí, e comecei porque ás veces o mellor amigo dun rapaz é o papel xa que lle podes confiar todo e non llo di a ninguén. Os meus sentimentos, o meu pensamento…, quedaron no papel gardados por sempre.

-Tivo moitas dificultades para publicar a súa obra?
-Non, excepto ao final que tiven que apuralo e rematalo porque a editorial fíxome acabalo en pouco tempo.

-Economicamente compénsalle escribir? E se non é así, entón porque outro motivo compénsalle?
-Economicamente claro que non compensa, moi poucos escritores viven só disto.Todos os escritores teñen outro emprego aparte da escritura, eu por exemplo son profesor de primaria.
Eu escribo porque, logo de ter escritos os libros que escribín ao longo da miña vida, a verdadeira recompensa aparece cando alguén se me achega e me di que lle gustou a miña obra.
Un día que estaba na praia, fixeime nunha muller que estaba a ler o meu libro, esa é a verdadeira recompensa. Unha mirada cómplice e un sorriso non hai moedas que os paguen.

-De que maneira inflúe o seu lugar de nacemento no libro?
-Pois... dalgunha maneira sempre acaba influíndo, porque eu fun criado nun lugar no que existían os regatos, os camiños, as montañas...polo que decidín inspirarme mellor nisto ca nas cidades.

-Que temáticas tratan as súas obras aparte da materia de Bretaña?
-Tamén tratan sobre o amor prohibido e cousas así.

-Cal é para vostede dos seus libros o favorito?
-A miña obra favorita, entre outras é Orballo da mañá porque é unha obra real.

-E o seu favorito doutros escritores?
-Gústame moito A Odisea de Homero polas súas descricións e porque conta moitísima historia, e antes de comezar a escribir unha obra así, hai que ambientarse e informarse sobre a época...
Eu a vós recoméndovos o libro de Robert Stevenson que se chama O diaño da botella pero non vos vou contar de que trata por se vos animades a lelo.

-Da literatura galega, cal é a súa obra favorita?
-Clásicos como Rosalía de Castro e tamén me gusta moito A Esmorga de Eduardo Blanco Amor, paisano meu de Ourense.

-Por que escolleu para o libro que lemos un público xuvenil?
-Escollín un público xuvenil porque é coa xente que traballo cada día e paréceme que vos coñezo mellor a vós que as persoas maiores. A vos na idade na que estades nótasevos todo.
Escribir para un público maior é algo máis difícil porque igual se senten ofendidos polo que len, e vós aínda que pensedes que sodes moi maiores aínda sodes uns neniños e o que sentides e pensades é moi doado de saber.


-Por que titulou así o libro?
-Púxenlle este titulo Améndoas e flores silvestres, porque o cheiro das flores silvestres é moi fresco e ese cheiro tróuxome moitos recordos da miña xuventude que eu tiña ganas de recordar.

Encontro co escritor David D. Vázquez Álvarez

O 27 de novembro @s alumn@s de 3º e 4º da ESO tiveron un encontro co escritor de literatura infantil e xuvenil David D. Vázquez Álvarez. O autor falounos do oficio de escribir, das ninfas, respondeu ás nosas dúbidas sobre Améndoas e flores silvestres (lectura da primeira avaliación) e asinounos os nosos libros.

Entrevista ao escritor PERE TOBARUELA, realizada por Alba Campo Alves e Sandra Darriba Priego, alumnas de 2º ESO C

O día 24 de novembro visitounos no IES Pedro Floriani o escritor, nado en Barcelona, Pere Tobaruela. Asistimos a falar con el o alumnado de primeiro e segundo de ESO, que leramos o seu libro Viaxes dun can de palleiro.
A nosa curiosidade levounos a facerlle preguntas coma estas:
Por que es escritor? Gustábame escribir. E non pensaba ser escritor, pero gustábame publicar.
Pensas facer algunha película? Iso non é decisión do escritor.
Por que o libro ten tan poucas páxinas? É unha decisión da editorial.
Por que ese título? Porque viaxa moito e o can é o protagonista.
Tes algún can? Tiven, pero agora non.
Cantos libros escribiches? Uns 30.
Cal é o teu preferido? Case sempre é o que estás a escribir. Este libro lino unhas 30 veces. Cando o escribes, vívelo.
Por que fixeches este libro? Gustoume a idea, pareceume importante.
Por que te baseas na Odisea? Intentaba achegar a Odisea orixinal a vós dunha forma que entendades.
Só es escritor? Son un escritor profesional, publico en moitos sitios, entón gaño o suficiente para vivir. Levo 20 anos publicando e vivo da escritura hai 6.
Con cantos anos empezaches a publicar? Con 15 ou 16. Publiquei o primeiro libro en 1999.
Como tardaches tanto en escribilo se podías non gañar diñeiro? Hai que arriscarse.
Por que escribiches o libro en galego? Porque é para os galegos; se fose para os cataláns, faríao en catalán.
Como escribes en galego se es catalán? Cheguei en 2005 e escribín aquí. Tamén escribín historias para aprender o galego.
Por que un can relata a obra? Os heroes son os máis fortes e guapos. O can é o menos parecido a un heroe pero el é un heroe en si.
Por que o protagonista é un can de palleiro e non outra raza? Para min é o típico can feo, o tipo máis vulgar de can.
Por que non lle puxeches nome ao can? Realmente importa? Un can de palleiro é un can de palleiro e todos o coñecedes. Está moi individualizado.
Por que as sereas eran así? As imaxes que temos delas son de Walt Disney, hoxe en día todos son guapos, pero na realidade non é así. Ben, non sei se existiron.
Ulises existiu? Malo será...
Por que ás Illas Cíes as chamas Sías? Porque antes se chamaban Sías e eu quero recuperar os topónimos.
Por que non puxeches ilustracións? Porque custa máis diñeiro, pero quedaría moi ben.
En que te inspiras? É moi difícil... Eu teño métodos, cando escribes é como un estado de ánimo. Por exemplo, se estou escribindo algo triste poño na radio unha canción triste e se escribo algo alegre poño unha canción alegre.
Vas continuar este libro? De momento non o teño pensado.

PEQUENA BIBLIO-BIOGRAFÍA DE PERE TOBARUELA

Pere Tobaruela (Barcelona, 1965), é licenciado en Xeografía e Historia e desenvolveu tarefas xornalísticas durante bastante tempo ata que, hai uns anos, decidiu dedicarse só á súa carreira literaria.
De feito, desde 1999 leva publicadas unha decena de obras, todas en catalán: ensaio (El delta del Llobregat, Etologia e Floquet per sempre), escolma de entrevistas (Darrere l’horitzó e L’home i el territori), novela xuvenil (La Torre dels Moros e La Clau d’Aigua), biografía (Okorobikó. Una biografia de Jordi Sabater Pi, editada pola National Geographic), cómic (Les aventures de Floquet de Neu) e mais novela para adultos (En blanc i negre).
Actualmente afincado en Galicia, incorporouse á literatura galega co libro de relatos Con ollos de neno, unha mirada crítica ao mundo actual e aos problemas que preocupan as cativos. Na lingua galega, escribiu algunhas das aventuras de cabaliño Blanco de Cores, Vouvos papar , en colaboración con Luz Méndez, e Viaxe dun can de palleiro.

Publicacións:

A rebelión das rúas. De Pere Tobaruela e A.Meixide. Colección: Branco de Cores, nº3, Sotelo Blanco Edicións
Unha vaca marela en Compostela. Colección: Branco de Cores, nº 5, Sotelo Blanco Edicións (2009).
Unha pantasma na cidade? Colección: Branco de Cores, nº6, Sotelo Branco Edicións.
Con ollos de neno. Colección: Mandaio, nº 22, Biblos clube de lectores.
Vouvos papar. De Pere Tobaruela e Luz Méndez. Xerais 2008.
Viaxes dun can de Palleiro. Colección: Sotelo Blanco infantil e xuvenil, nº 50, Sotelo Branco Edicións (2009)

Encontro co escritor Pere Tobaruela

O 24 de novembro @s alumn@s de 1º e 2º da ESO tiveron un encontro co escritor de orixe catalá Pere Tobaruela. Coa axuda da Odisea, percorremos co autor a xeografía da Viaxe dun can de palleiro (lectura da primeira avaliación).

XORNADAS DE FORMACIÓN DE USUARIOS : CURSO 2009-10

As xornadas de formación de usuarios están destinadas a informar a todo o alumnado sobre o funcionamento xeral da biblioteca do centro.

Os aspectos básicos que se tratan en cada sesión son os seguintes:

• información sobre as normas xerais da biblioteca
• utilización do servicio de préstamo de fondos
• exposición da organización espacial dos fondos na biblioteca
• presentación do boletín trimestral coas súas actividades correspondentes
• explicación sobre o buscador MEIGA

En cada sesión, dunha hora de duración, dedicada a cada grupo da ESO trátanse tanto as cuestións puramente teóricas (normas, préstamo, organización..) como as prácticas. Para esto, deséñanse unha serie de exercicios prácticos de busca de fondos da biblioteca, indicándose as diferentes formas de busca así como unha busca mais refinado utilizando filtros (idiomas, seccións).

As propostas de busca son ben por lista alfabética ou por frase ou texto comprobando así o alumnado o resultado tan diferente que se obtén: nun caso é unha lista alfabética dos fondos que empezan polo texto de mostra e noutro caso obtéñense as fichas dos fondos que conteñen o texto de mostra.
Indicamos así mesmo, que ademais destas formas mais xerais de busca pódense utilizar outras por autor, materia (cine, CCNN, historia..), serie ( coleccións), CDU, editorial ou ISBN.

O calendario por cursos de formación de usuarios para este ano é o seguinte:

Neste ano académico decidimos elaborar unha actividade mais lúdica que compaxinara a busca no MEIGA coa localización dos fondos na nosa biblioteca. Deseñamos un xogo no que a personaxe principal é un trasno que quere enfrontarse o noso alumnado e gañarlle nun pulso por ver quen resolve mais rápido o misterio dos libros agochados.

Podes descargar os materiais relacionados con esta actividade na seguinte ligazón.

A continuación presentamos as regras do xogo e ao noso trasno

O TRASNO E AS SÚAS TRASNADAS

O XOGO:

ESTE TRASNIÑO SEMENTOU O CAOS NA NOSA BIIBLIOTECA: AGOCHOU LIBROS FORA DOS SEUS LUGARES HABITUAIS RESULTANDO UN DESORDEN COMPLETO.
O OBXECTIIVO DO XOGO É O DE LOCALIIZAR AS FICHAS DOS LIBROS DESAPARECIDOS.
EN CADA UNHA DAS FICHAS O TRASNO DEIXOU UNHA MENSAXE CON PISTAS E COMENTARIOS MALICIOSOS. CADA GRUPO DE ALUMNOS ( 6 EN TOTAL) DEBERÁ LOCALIZAR O TÍTULO E DEVOLVELO O SEU LUGAR DE ORIXE. CADA GRUPO QUE O CONSIGA RECIBE COMO RECOMPENSA UN ANACO DE TRASNO EN FORMA DE PUZZLE. SE TODOS OS GRUIPOS RESOLVEN O MIISTERIO, O PUZZLE PODERÁ COMPLETARSE E ASÍ TERÁN GAÑADO O XOGO AO TRASNO.

SAMAÍN NA BIBLIOTECA

Este ano celebramos o Samaín lendo relatos de terror na biblioteca. Á luz das cabazas e das candeas, con imaxes arrepiantes proxectadas na pantalla, lemos obras en varios idiomas (galego, inglés, francés...) que puñan a pel de galiña.
Algúns dos libros máis prestados con relatos de medo ou suspense son:
DIESTE, R.: Á lus do candil.
GASPAR, S.: Antoloxía do conto galego de medo.
MAUPASSANT, G. et al.: Contos de medo.
POE, E. A. et al.: El gran libro del miedo.

E as películas:
BAYONA, J.A.: El orfanato.
DEL TORO, G.: El laberinto do fauno.

UN TRUCO PARA O BUSCADOR MEIGA
Abre o buscador nesta ligazón. Se queres buscar todos os títulos que conteñen a palabra “medo” fai a seguinte busca:
BUSCAR POR: Frase ou texto
EN: Título
(Texto de busca): medo
PREGUNTA: Como podo facer para que non aparezan El caballero de Olmedo e Os comedores de patacas, que teñen as letras m-e-d-o dentro doutras palabras (Olm-e-d-o, com-e-d-ores)?
RESPOSTA: Fai a mesma busca, pero en vez de buscar por “Frase ou texto” busca por “Frase exacta”:
BUSCAR POR: Frase exacta
EN: Título
(Texto de busca): medo
Podes ir directamente aos resultados:
“medo” por Frase ou texto
“medo” por Frase exacta

XA ANDAN VIAXANDO AS MOCHILAS VIAXEIRAS POLO IES PEDRO FLORIANI !!!

Este ano, o noso centro acordou incorporarse ao programa “Mochilas Viaxeiras” de Bibliotecas Escolares da Xunta de Galicia. Decidimos comezar polo primeiro ciclo da ESO, pensando na importancia de incentivar o alumnado de menor idade.

A iniciativa partiu do Equipo de Biblioteca do IES Pedro Floriani porque cremos na importancia do fomento de lectura desde a casa e na colaboración entre pais/nais e profesor@s para que o noso alumnado descubra a afección lectora e adquira moi boas capacidades comprensivas e expresivas.

Desde a Biblioteca, agardamos que vos guste esta actividade e de que participedes, a través do Caderno da Mochila Viaxeira anotando suxestións para mellorala e as vosas experiencias lectoras.