CHARLAS - O MANIFESTO COMUNISTA 6

6ª sesión: O comunismo despois de Marx
Proletarios de todos os países, unídevos!

A última charla por este ano trata sobre o comunismo despois de Marx. Coñecemos a historia: os dous bloques, a caída do telón de aceiro, China, Corea e Cuba... Pero agora enterámonos do trasfondo filosófico destes sucesos da man de María de la Fuente, Alba Estévez, Irene Iglesias, Sara Otero e Daniel Rodríguez.

Sara rompe o (escaso) xeo comentando as medidas que Marx e Engels consideraban imprescindibles para dar inicio á ditadura do proletariado e que Javier nos avanzara na 4ª sesión:
Expropiación da terra
Forte imposto progresivo
Nacionalización de sectores da economía
Obrigación (dereito) de traballo para todos
Servizos básicos públicos

Continúa Irene: a revolución soviética non era previsible desde o punto de vista marxista porque era unha rebelión do proletariado contra a aristocracia, sen a intermediación da burguesía e a industrialización. Pero, fose como fose, deixou ao mundo dividido en dous bloques: o capitalista da OTAN e o comunista do Pacto de Varsovia.

Que avances supuxo o comunismo? María fai un repaso aos principais:
Dereito á alimentación, traballo e vivenda
Seguridade social e educación gratuitas e de calidade
Pensións e baixas laborais
Avances tecnolóxicos

E é real esta situación? Daniel responde analizando a situación da Cuba actual, onde hai grandes avances (educación e sanidade, alimentación, autoconsumo) pero tamén grandes atrasos (totalitarismo, presas/os políticas/os, violacions dos dereitos humanos).

Agora ben, pode o capitalismo sobrevivir desoindo a Marx? Alba amosa que as crises capitalistas que se describen no Manifesto son unha realidade: basta mirar arredor de  nós.
Pero xa despois do Crac do 29 se tomaran medidas para implementar as propostas que Keynes tomara do marxismo para poder salvar o capitalismo:

Imposto progresivo
Intervención do Estado en favor dos sectores en ciclo baixo
Incentivación do movemento económico
Protección dos sectores estratéxicos
 
Finalizamos esta actividade por este ano!
PARABÉNS! Foi un interesantísimo traballo
Grazas á xente de 2º Bach. pola súa asistencia e apoio!
Vémonos o ano que vén!!!
 





Materiais para descargar

Descarga a presentación e o cartel premendo nas ligazóns:



Para descargar as seis presentacións e os seis carteis da serie (con compresión RAR) preme aquí:


CHARLAS - O MANIFESTO COMUNISTA 5

5ª sesión: Comunistas e Socialistas (Capítulo 3 da obra)
Proletarios de todos os países, unídevos!



A nosa charla de hoxe é sobre o terceiro capítulo da obra, no que Marx e Engels revisan a literatura socialista anterior ao Manifesto.
Os esforzos destes dous autores dedicáronse a crear unha teoría científica do socialismo, e o que critican en todas as formas anteriores é que, no mellor dos casos, tratábase dun socialismo utópico dirixido pola burguesía, cando non dun intento reaccionario de desmobilizar ao proletariado.

Hoxe presentan Carlos Rafael, Samuel Soutullo e Samuel Rodríguez... e grazas a Antonella Panebianco polas fotos do móbil!!!



Comeza Carlos explicando o socialismo feudal, que estaba impulsado pola nobreza medieval coa intención de mellorar as condicións de vida da clase traballadora. Non hai máis que pensar que o clero estaba a favor para decatarse de que en definitiva só se trataba dun parche para calmar o descontento do pobo.

O socialismo pequeno burgués, que nos explica Samuel Soutullo, foi un paso intermedio, necesario no seu momento, pero que había que superar. Esixía melloras para a burguesía que se fora asentando nas cidades, onde acumulara riqueza e poder. Pero só querían restaurar os antigos medios de produción gremial baixo a súa supervisión, sen ceder no seu dominio sobre a clase obreira.

Finalmente, Samuel Rodríguez resume as coñecidas críticas de Marx e Engels aos utopistas: Fourier, Owen e Saint-Simon. O seu compromiso foi real pero o seu socialismo non era científico e levou a unha serie de actitudes paternalistas, sen melloras a longo prazo.
O verdadeiro comunismo científico esixe como condición da fin da opresión a revolución proletaria. O texto remata coa famosa frase:


Proletarios de todos os países, unídevos!
 



Materiais para descargar

Para descarga a presentación e o cartel, preme nestas ligazóns:


CHARLAS - O MANIFESTO COMUNISTA 4

4ª sesión: Proletarios e Comunistas (Capítulo 2 da obra)
Cando desaparezan as actuais relacións de produción desaparecerán os antagonismos de clase

O segundo capítulo da obra trata sobre a relación entre proletariado e o comunismo. Marx e Engels contestan a moitas das críticas que se fan aos comunistas e propoñen unhas accións mínimas que deberán liberar o proletariado da opresión.
Hoxe tiñan que falar Carmen Cuntín, Miguel González, Manuel Pérez e Javier Pérez, pero desafortunadamente Manuel púxose enfermo e houbo que explicar a súa parte entre as/os demais. Que te mellores, Manuel!



Miguel analiza as críticas que a burguesía fai ao comunismo: quere acabar coa propiedade, a educación, a familia... pero estes dereitos xa non existen para o proletariado porque a burguesía apropiouse deles para o seu negocio: as mulleres, os fillos, as escolas, as fábricas... son para quen só fai traballo especulativo mentres a quen fai traballo produtivo se lle negan as relacións humanas, a cultura e o progreso.

A unha determinada forma de produción, explica Carmen, correspóndenlle unhas determinadas leis, unha determinada moral, unhas determinadas crenzas. Cando o proletariado teña acceso á propiedade e non haxa unha clase que viva sen facer traballo produtivo a propiedade comunal dos bens será considerada xusta e boa, e non haberá ninguén a quen se lle neguen as vantaxes doo progreso nin a riqueza producida pola sociedade.

Javier fai un resumo das condicións que Marx e Engels consideran necesarias para a emancipación da clase obreira. Comentaranse máis a fondo na 6ª sesión, pero algunhas das máis importantes son as seguintes:
Expropiación da terra
Forte imposto progresivo
Nacionalización de sectores da economía
Obrigación (dereito) de traballo para todos
Servizos básicos públicos

 


Materiais para descargar

Descarga a presentación e o cartel nestas ligazóns: