Unha viaxe polo mundo dos Dereitos Humanos

   Rede de Escolas de Amnistía Internacional - Encontro con Manuel Martínez-Barreiro   

Mellor acender unha buxía que maldicir a escuridade

 

Nesta actividade colaboramos o Proxecto de Biblioteca 2014-15 Unha viaxe arredor do mundo, o Grupo da Rede de Escolas do IES Pedro Floriani e o Departamento de Filosofía.
   A redacción da noticia fixémola a partir dun texto de Alba Rodríguez (4º ESO B), con contribucións de todo o alumnado de 2º e 4º da ESO.

 

Tivemos este encontro o día 10 de decembro con motivo do Día Internacional dos Dereitos Humanos. Este mesmo día todos os periódicos saían co titular: “A CIA tortura os prisioneiros na guerra de Iraq”, e no artigo denunciábase o feito.

   Amnistía Internacional   
Manuel é membro de Amnistía Internacional e explicounos que esta organización loita polos dereitos de todas as persoas.

É unha organización non gobernamental polo que, como non recibe diñeiro de ningún estado, pode actuar con total independencia.
Nace como consecuencia da detención de dous estudantes portugueses que gritaron “Viva a liberdade”, o que lle serviu a Peter Benenson como inspiración para crear Amnistía en Londres no ano 1961.
Posúe 2 premios Nobel e, na actualidade, conta con máis de 3 millóns de membros e simpatizantes por todo o mundo.

   Os Dereitos Humanos   
Posteriormente falounos sobre os dereitos, que son unha especie de coraza e, por sermos persoas, témolos todas/os sen discriminación por razón de raza, sexo, relixión...

Son inalienables e intransferibles: o recoñecemento dun dereito leva ao recoñecemento de todos os demais.
En Francia non se pode dicir “dereitos humanos” porque para eles esta expresión ten un significado distinto e propuxeron chamalos “dereitos naturais” ou “dereitos da/o cidadá/án”.
Os principais pasos que se foron dando en favor dos Dereitos Humanos foron estes:

- Código de Hammurabi, 2000 aC
- Cilindro de Ciro, 529 aC
- Carta Magna, 1215
- Petición de dereitos, 1628
- Constitución dos EEUU de América do Norte, 1787
- Declaración francesa dos dereitos do home e o cidadán, 1789
- Carta de dereitos dos EEUU de América do Norte, 1791
- Declaración Universal, da ONU, 1948
Esta última é a que recolle o que cremos actualmente, e na súa redacción tivo un papel importante Eleanor Roosevelt.

   A noticia do periódico   
Para acabar, Manuel volveu ao principio e leu completo o titular:

A CIA torturou con brutalidade, ineficacia e á marxe da lei
(El País, 10-12-2014).

e deixounos coa pregunta:
Pero… é que se pode torturar sen brutalidade?
Ou con eficacia?
Ou dentro da lei???


   As imaxes   
Fixemos algunhas fotos do encontro, cos grupos de 2º e 4º da ESO, e cando xa rematamos Manuel quedou charlando un ratiño con  Sergio ,  Lara ,  Eva  e  Gabriela , do Grupo da Rede de Escolas do noso centro.

 

Poñémosvos tamén aquí unha presentación que estivemos comentando cos cartaces das accións que realizou Amnistía Internacional nos últimos anos en Vigo:



No hay comentarios:

Publicar un comentario