CLUB LECTURA MIXTO 1ª SESIÓN: A SEMANA DAS CIENCIAS

MADAME CURIE, ALTRUÍSMO E INVESTIGACIÓN DESINTERESADA

Feito por Rebeca González, Persoal Administrativo do centro

O pasado día 15 de novembro celebrouse unha xuntanza do club de lectura na que o tema a tratar foi a premio Nobel “Marie Curie”. Para elo, os membros do club limos un libro sobre a súa biografía e tamén miramos unha película na que se plasmaba en imaxes o que antes leramos.

A reunión foi moi amena e interesante xa que entre o membros atópase a profesora Fátima Estévez que nos acercou, con anécdotas e comentarios, un pouco mais á súa vida.

O que mais me sorprendeu foi, por unha banda, o seu altruísmo á hora de traballar e que a súa motivación estaba baseada soamente en axudar á humanidade cos seus logros e non no seu progreso persoal, acadando un recoñecemento ante os demais, ou económico, incrementando o seu patrimonio, pois a súa vida era moi austera aínda que coas patentes dos seus descubrimentos podía haber vivido acomodadamente. Sen embargo, tanto ela como o seu marido facilitaron as súas investigacións a todo aquel que estivera interesado.

E, por outra parte, os escasos medios cos que tiña que traballar. De feito na película amósase o precario laboratorio no que traballaba, que mais ben era un alpendre, e os materiais que utilizaba, pois apréciase como no laboratorio se acumulaban grandes montañas de mineral do cal soamente se chegaba a extraer un gramo de radio.

Destacouse no faladoiro que foi unha muller pioneira en diversas cousas, pois foi a primeira en ser Premio Nobel, ademais foino dúas veces, en impartir clases na Universidade da Sorbona, etc., ademais de romper cos prototipos de muller-esposa-nai da época.

Penso que o que si nos quedou claro a todos os membros do club de lectura foi unha cousa: A impagable herdanza que nos deixou no campo médico e que hoxe todos damos por feito pero que foi o logro de toda unha vida xenial dedicada a ciencia, a cal debemos estar moi agradecidos.

Referencias das obras citadas


Gordon, Mercedes: María Curie, la descubridora del radio

LeRoy, Mervyn: Marie Curie