Presentación da biblioteca para 1º de Bacharelato - Visita

No Departamento de Filosofía encargámonos, como en anos anteriores, da presentación da biblioteca para 1º Bach. cando está comezando o novo curso.





Utilizamos a documentación que xa subimos nun post anterior e que podedes ver picando nesta imaxe:

En primeiro lugar, aprendemos algunhas das claves CDU (as que utilizamos con máis frecuencia).

Paramos un rato na sección de filosofía para ver os apartados que hai e onde podemos atopar os libros para a actividade de lectura.

A maior parte deles están na sección de literatura filosófica, que ten a clave 1(82), ou de textos, que ten simplemente o número 1. Pero tamén hai obras na sección de literatura nas linguas clásicas, que ten o número 87, na de literatura americana, no número 821.111, e outras. Así fixemos tamén, como di o proxecto de biblioteca deste ano, unha viaxe polo mundo. Adrián encargouse de facer as primeiras buscas utilizando o buscador MEIGA, mentres mirábamos na pantalla o que ía facendo.

Alicia, que xa é experta, ensinoulle a Candela (e a toda a xente que entrou este ano) a usar o programa de autoempréstito para pedir libros prestados e facer despois a devolución.

Finalmente, entramos nalgunhas páxinas de internet interesantes, como a de OPAC Meiga para facer buscas online ou a de Bibliotecas Escolares para ver as campañas de animación á lectura, as novas da bibliotecas de Galiza, etc.

Presentación da biblioteca para 1º de Bacharelato - Materiais

BENVIDAS/OS AO CURSO 2014-15

Como cada ano, saudamos ao novo alumnado de 1º de Bacharelato e facemos para elas/es a presentación da biblioteca.
Colabora con nós o Departamento de Filosofía, e faremos exemplos de busca e empréstito con libros do currículo lector da materia Filosofía e Cidadanía. Os temas que trataremos serán os seguintes:

1. Organización da Biblioteca. O sistema CDU.
2. Busca de obras no catálogo.
3. O servizo de autoempréstito.
4. Algunhas ligazóns.

1. Organización da Biblioteca. O sistema CDU
Os fondos da biblioteca (libros, CDs, DVDs, revistas...) están organizados mediante un sistema chamado CDU (Clasificación Decimal Universal). Cada número representa unha materia e cada nova cifra que se engade á dereita indica un apartado dentro desa materia. Pica na imaxe para ver un resumo no blog de Bibliotecas Escolares de Galicia:

 

Ves que á filosofía lle corresponde a cor azul clara e o número 1. Nós utilizamos este número para as obras de filosofía en xeral (sobre todo, textos moi relevantes). Pero se son textos especializados engadimos cifras á dereita do 1 (por exemplo, o 15 significa Psicoloxía, o 16 Epistemoloxía, o 17 Ética, etc.).
Para indicar o tipo de fondo de que se trata pódense utilizar auxiliares: 1(03) significa manuais, 1(82) obras en forma de literatura (por exemplo, novelas filosóficas), etc.
Estas claves son as que permiten atopar despois as obras nos andeis. Fíxate como están marcadas mediante etiquetas.

2. Busca de obras no catálogo
Nos ordenadores da biblioteca podes atopar dous programas, o buscador OPAC  e o servizo de autoempréstito. Falaremos agora do primeiro e na seguinte sección do segundo.
O buscador permite utilizar varios criterios. O máis cómodo adoita ser a busca por Título, utilizando a opción Texto libre.
Pódese buscar tamén por Materia e por CDU.
Fai a proba buscando libros ou películas do currículo de filosofía.
Como o proxecto de biblioteca deste ano é Unha volta arredor do mundo faremos prácticas buscando obras de autoras/es de distintas nacionalidades:

El segundo sexo (Francia: Simone de Beauvoir)
Tao te king (China: Lao Tse)
Aristóteles, o mestre dos que saben (Galiza: Alfredo Marcos)
A república (Grecia: Platón)
Crítica da razón pura (Alemaña: Kant) 

Cando teñas os datos do fondo podes picar na lapela de Multimedia para ver, no campo Signatura 1, o seu código CDU e localizalo no andel correspondente.

3. O servizo de autoempréstito 
O segundo programa permite rexistrar o préstamo e a devolución de fondos dun xeito rápido e  cómodo. Para utilizalo tes que seguir os pasos do programa:

1. Introducir o teu número de lector/a (Déroncho en titoría hai uns días).
2. Indicar se queres facer un préstamo ou unha devolución.
3. Introducir o número de rexistro do fondo (se é un libro estará escrito na primeira páxina).
4. Confirmar o préstamo ou devolución se os datos son correctos.
5. Se é un préstamo dun libro, escribir o teu nome e a data de devolución na etiqueta que está na primeira páxina.
6. Se é unha devolución, entregarllo á/ao profesor/a que estea de garda para que marque Devolto na etiqueta e o leve outra vez ao andel correspondente.

4. Algunhas ligazóns
Para ver o catálogo da nosa biblioteca podes ir á páxina do IES Pedro Floriani na Rede de Bibliotecas Escolares de Galicia:

Para profundar na CDU podes visitar o blog de Bibliotecas Escolares e consultar estes titoriais:

A CDU - resumo explicativo (PDF)

Listaxe de claves CDU para bacharelato (PDF)

 

HORA DE LER 2014-15

Unha das actividades da biblioteca que mellor foron valoradas o ano pasado foi a hora de ler. Para organizala mellor fixemos quendas semanais e, este ano, facémolo aínda mais doado xuntando a todos os cursos da ESO para ler á mesma hora. Así que xa temos os horarios: