CONCURSO DE SOBREMESAS DE OUTONO E SAMAÍN

 Tal e como vén sendo habitual no no Floriani, este ano tamén celebramos un concurso de sobremesas de Outono e Samaín, organizado polo Departamento de Dinamización Lingüística coa colaboración da biblioteca. Aínda que de momento non está aberta ao público porque seguimos de reformas, fixemos unha excepción e reunímonos alí para celebrar o concurso. 

Houbo premios en varias categorías:

- "Padal de ouro" para a sobremesa máis saborosa. 

- "Entra polos ollos" para a mellor presentada. 

- "Dá medo" para a máis terrorífica. 

- "Man experta" á máis orixinal. 

O nivel foi moi alto e o noso xurado tívoo moi difícil para elixir as persoas gañadoras. 

Mentres eles deliberaban, os demais demos boa conta das sobremesas... 

ESTABAN DE MORTE!!

EXPOFLORIANI

 ¡Por fin chegou EXPOFLORIANI 2023, o resultado dun arduo traballo por parte do profesorado do grupo de Novas Pedagoxías do noso centro e, sobre todo, do noso fantástico alumnado, do que non podemos estar máis orgullosas e orgullosos.

 Foi unha mañá moi intensa, pero pagou a pena poder dar a coñecer o resultado do noso traballo e tratar de mellorar un chisquiño as vidas da xente do noso entorno. 

Parabéns ao alumnado e profesorado participante, foi todo un éxito!!

CERRADO POR REFORMAS

 Este curso, na adxudicación de fondos do PLAMBE (Plan de Mellora das Bibliotecas Escolares), recibimos un diñeiro para adquirir novo mobiliario, polo que decidimos aproveitar e renovar a nosa biblio para facela máis accesible e diáfana. 

Para facelo, debemos pechar a biblioteca durante un tempiño, para poñela guapa. Pregámosvos que sexades pacientes, trataremos de volver o antes posible. 

AGASALLOS

 Esta semana entregamos agasallos ao alumnado que participou nas actividades do Día do Libro caracterizándose de personaxes literarios, e tamén aos que gañaron o concurso adiviñando todos os personaxes e relacionándoos coas súas respectivas obras. 

¡Noraboa e grazas pola vosa participación!

OBRADOIROS DE POESÍA CON ELVIRA RIBEIRO E ALBA CID

A finais de marzo, o alumnado de  2º de ESO desfrutou dun interesante obradoiro de poesía e hoxe tocoulle o turno a 1º de ESO. Os obradoiros correron a cargo de dúas das grandes poetas galegas do panorama actual, ELVIRA RIBEIRO e ALBA CID.

 Con elas creamos, escoitamos e desfrutamos aprendendo que a poesía está ao noso redor e que pode ser moi divertida. Foi un pracer recibir a súa visita e esperamos repetir no futuro. ¡Moitas grazas a ambas!

AÍ VÉN O MAIO...

 Estes días estivemos axudando a preparar o maio do Floriani que organiza o Departamento de Dinamización Lingüística. Mirade que chulo nos está quedando...

A ORIXE DO CINE EN GALICIA

 Hoxe o alumnado de 2º ESO asistiu a unha interesantísima actividade sobre a figura de José Gil, pioneiro do cinema en Galicia, e os primeiros tempos desa arte na nosa terra. Visitamos a réplica do camión no que José Gil trouxo o cinema a Redondela hai máis de cen anos e ata vimos unha divertidísima película de cine mudo con Javi e Lucía, de 2º de ESO, como explicadores de excepción. 

Por certo, o público de Redondela terá a oportunidade de desfrutar do camión, as proxeccións e a música este domingo, non o perdades!

LECTURA NA RÚA

 Hoxe participamos, xunto ao resto dos coles e institutos do concello de Redondela, na LECTURA NA RÚA organizada polo CEP Santa Mariña, a ANPA Ernestina Otero, o Concello e a Biblioteca Municipal con motivo do Día do Libro. 

Durante toda a mañá lemos, intercambiamos marcapáxinas, cantamos, bailamos, coñecemos novos amigos, reencontrámonos con vellos coñecidos... foi unha mañá moi divertida e enriquecedora. 

Noraboa ás organizadoras polo gran traballo realizado e moitas grazas por convidarnos á festa da lectura. 

DÍA DO LIBRO 2023

 Como a ocasión o merecía, para celebrar o DÍA DO LIBRO montamos unha boa festa e recibimos a visita de moitos personaxes literarios: Hamlet, Alicia, Mary Popins, Dulcinea, Mowgli, Baloo, Ana Ozores... e moitos máis!! Fixemos un xogo-concurso relacionando os personaxes cos seus libros, sacamos fotos no noso "photocall"... e algúns ata cantaron e bailaron!

"ESCAPE ROOM" DE MULLERES CIENTÍFICAS

 Un venres de finais de marzo, grazas á colaboración do concello, a empresa "Héroes para a ciencia" preparou un divertido e interesante "escape room" sobre mulleres científicas para o alumnado de 1º de ESO. 

¡Pasámolo xenial e aprendemos moitas cousas!

PRESENTACIÓN DO LIBRO "8 SEÑALES"

 O xoves recibimos a visita de Noelia Míguez, que nos veu presentar o seu libro Ocho señales e falarnos da súa terrible experiencia como muller maltratada e vítima de intento de asasinato por parte da que era a súa parella. O seu testemuño foi sobrecolledor, pero quedámonos sobre todo coa forza e a enerxía que transmite na súa loita para intentar evitar que outras rapazas pasen polo mesmo. 

Moitas grazas, Noelia. Foi un pracer terte no Floriani. E grazas tamén a Lence, o noso profe de Relixión, que organizou a actividade. 

CONCURSO DE PI-RELATOS

 Aproveitando o DÍA DO NÚMERO PI, celebrado o 14 de marzo, o Departamento de Matemáticas e a biblioteca organizamos un concurso de relatos seguindo o número pi: a primeira palabra debía ter tres letras; a segunda, unha; a terceira, catro, e así sucesivamente...

A gañadora foi NEREA VEIGA, de 1º de Bacharelato. 

¡NORABOA, NEREA! 

DÍA DA POESÍA CON "ALDAOLADO"

Onte, 21 de marzo, foi o DÍA MUNDIAL DA POESÍA. E nós celebrámolo hoxe asistindo, xunto con compañeiras e compañeiros do IES Illa de San Simón e do IES Mendiño, a un espectáculo das marabillosas ALDAOLADO. Pasámolo xenial e constatamos, unha vez máis, que a poesía pode ser moi divertida. Moitas grazas ao Servizo de Normalización Lingüística do concello de Redondela, que o fixo posible.