Esta semana entregamos agasallos ao alumnado que participou nas actividades do Día do Libro caracterizándose de personaxes literarios, e tamén aos que gañaron o concurso adiviñando todos os personaxes e relacionándoos coas súas respectivas obras.
¡Noraboa e grazas pola vosa participación!
Estes días estivemos axudando a preparar o maio do Floriani que organiza o Departamento de Dinamización Lingüística. Mirade que chulo nos está quedando...
Hoxe o alumnado de 2º ESO asistiu a unha interesantísima actividade sobre a figura de José Gil, pioneiro do cinema en Galicia, e os primeiros tempos desa arte na nosa terra. Visitamos a réplica do camión no que José Gil trouxo o cinema a Redondela hai máis de cen anos e ata vimos unha divertidísima película de cine mudo con Javi e Lucía, de 2º de ESO, como explicadores de excepción.
Por certo, o público de Redondela terá a oportunidade de desfrutar do camión, as proxeccións e a música este domingo, non o perdades!
Hoxe participamos, xunto ao resto dos coles e institutos do concello de Redondela, na LECTURA NA RÚA organizada polo CEP Santa Mariña, a ANPA Ernestina Otero, o Concello e a Biblioteca Municipal con motivo do Día do Libro.
Durante toda a mañá lemos, intercambiamos marcapáxinas, cantamos, bailamos, coñecemos novos amigos, reencontrámonos con vellos coñecidos... foi unha mañá moi divertida e enriquecedora.
Noraboa ás organizadoras polo gran traballo realizado e moitas grazas por convidarnos á festa da lectura.
Para celebrar o 8M, na biblioteca organizamos unha actividade na que participou un bo grupo de profesoras e profesores e case todo o noso alumnado de diúrno.
O obxectivo da actividade era dar a coñecer entre o alumnado o traballo dalgunhas mulleres da nosa historia que, en moitos casos, foi silenciado durante décadas ou mesmo séculos. Así, o día 7 de marzo visitaron o noso patio grandes figuras como Rosalind Franklin, Exeria, Hedy Lamarr, Frida Kahlo, Hildegarde von Bingen ou Ernestina Otero, entre moitas outras. O alumnado tiña que dialogar con elas para coñecelas un pouco mellor e poder responder a un cuestionario e, así, participar nun sorteo. A participación foi todo un éxito, as nosas alumnas e os nosos alumnos pasárono moi ben, aprenderon e algúns deles ata levaron premio!
No equipo da biblioteca estamos moi orgullosas da xente do Floriani e desde aquí damos as grazas a todo o profesorado e o alumnado que participou na actividade. Sodes @s mellores!!
E despois desta semana tan exipcia, o profesorado do Floriani aproveitou o attrezzo da biblioteca para vestirse acorde con el. Non faltou ninguén: nin o faraón, nin a raíña, nin a momia, nin sequera a pedra Rossetta ou o río Nilo.
O alumnado de 3º e 4º de ESO viaxou esta semana ao Antigo Exipto. Para volver, tiveron que traballar en equipo a contrarreloxo e atopar o escarabello dourado do faraón a partir dunhas pistas e acertixos. A "escape room" foi todo un éxito: divertíronse, aprenderon e, sobre todo, conseguiron volver, con máis ou menos axuda, á actualidade. Houbo premios para os equipos que o conseguiron en menos tempo. 😉
E para rematar fixemos unha sesión extra cun grupo de 2ºde Bac que atopou un oco entre a voráxine que supón ese curso para escapar ao tempo dos faraóns... e volver para contalo e a tempo de participar na ABAU!
Este ano dedicamos o Entroido ao mundo exipcio e así a temos decorada... todo listo para a actividade sorpresa da semana que vén!!
En novembro de 2022 recordamos unha triste efeméride: o afundimento do petroleiro Prestige preto das nosas costas, que provocou a maior marea negra da historia de Galicia e que afectou moito a todas as Rías Baixas e, polo tanto, tamén a Redondela.
A maior parte do noso alumnado non nacera aínda e moitos nunca oíran falar do Prestige, así que no Floriani dedicamos uns días a contarlles todo aquilo, a animal@s a preguntar nas súas casas e a descubrir por si mesm@s, porque a memoria é importante e coñecer o pasado é o único que nos pode salvar de repetilo.
Aquí van algunhas fotos do que fixemos naqueles días: carteis, traballos sobre os ecosistemas mariños, exposicións...
Pero tamén quixemos que algunhas das persoas da nosa contorna que viviron aquela situación de preto viñeran para contárnolo e organizamos unha charla con Julio e José Manuel, que hai 20 anos eran, respectivamente, vicepatrón maior da confraría de Vigo e armador. Eles viñeron falarnos, en primeira persoa, da súa experiencia loitando contra o chapapote coas súas propias mans, impedindo así que entrase nas rías e que a catástrofe medioambiental e económica fose aínda peor. Moitas grazas aos dous por acompañarnos naquela mesa redonda, por ensinarnos tanto e por responder ás nosas preguntas. E moitas grazas tamén porque hai 20 anos tiveron moi claro o que había que facer e non dubidaron en dar un paso á fronte para salvar a ría, a pesar da incerteza e a falta de medios.
